ರಾಮಾಚಾರಿ! ... ಮೇಷ್ಟ್ರೇ! ..

"ಮೇಷ್ಟ್ರೇ! ... ರಾಮಾಚಾರಿ! ... ಮೇಷ್ಟ್ರೇ! ... ರಾಮಾಚಾರಿ!... "

ಕನ್ನಡ ಫಿಲಂ ಅಂದಾಕ್ಷಣ ನನ್ನ ತಲೆಯಲ್ಲಿ ಸುಳಿಯುವುದು ನಾಗರಹಾವಿನ ಈ ಡೈಲಾಗ್ !
ರಾಮಾಚಾರಿ ಮತ್ತು ಚಾಮಯ್ಯ ಮೇಷ್ಟ್ರು ಕಮರಿಯಲ್ಲಿ ಬಿದ್ದು ಅಸ್ತಂಗತರಾಗುವ ... ಎಂತವರಿಗಾದರೂ ಗಂಟಲು ಕಟ್ಟಿ ಬರುವಂತ ಸನ್ನಿವೇಶ...

ನಾನು ಕನ್ನಡ ಫಿಲಂ ಗಳನ್ನು ನೋಡಿರುವುದು ಕಡಿಮೆಯೇ!
ತಲೆ ಕೆಡಿಸಿ ನೆನಪಿಸಿಕೊಂಡರೂ ಲೆಕ್ಕ ಸಿಗುವುದು ಅಬ್ಬಬ್ಬಾ ಅಂದರೆ ಒಂದಿಪ್ಪತ್ತು ಒಳ್ಳೆಯ ಸಿನಿಮಾಗಳು.
ನಮ್ಮ ಜನಕ್ಕೆ ಗುಂಡಾಗಳನ್ನು ಫಿಲಂ ನಲ್ಲಿ ನೋಡುವುದಂದರೆ ಖುಷಿ ..
ಅದರಲ್ಲೂ ಆತ ನಮ್ಮ ತರಹದ ಮಿಡ್ಲ್ ಕ್ಲಾಸ್ ಪರಿಸರದಲ್ಲಿದ್ದು harmless ಮತ್ತು ಒಳ್ಳೆಯ ಗುಂಡನಾದರೆ ಆ ಫಿಲಂ ಹಿಟ್ ಗ್ಯಾರಂಟಿ ..
ಹಿಂದಿಯ ಮುನ್ನಾಭಾಯಿ ಕೂಡ ಇಂತಹುದೇ ಒಂದು ಪ್ರೀತಿಯ ಗುಂಡ...

ಹಾಗೆಯೇ ನಮ್ಮ ಕನ್ನಡದ ರಾಮಾಚಾರಿ. ಅವನ ಚಿಗುರು ಮೀಸೆ, ಓಡ್ದತನ, ಸುಕ್ಕು ಸುಕ್ಕಾದ ಪೈಜಾಮ, ಮೊಂಡತನ, ಕೇಳಿದ್ದನ್ನೆಲ್ಲಾ ನಂಬಿ ಬಿಡುವ ಮುಗ್ದತೆ, ಪರೀಕ್ಷೆಯಲ್ಲಿ ಕಾಪಿ ಹೊಡೆಯುವ creative ಪ್ರಯತ್ನ, ಪ್ರಿನ್ಸಿಪಾಲರ ಲಿಗೆ ಅರೆ ನಗ್ನ ಸೇವೆ, ನಾಗರ ಹಾವನ್ನೇ ಆದರ್ಶ ಮಾಡಿಕೊಳ್ಳುವ ಕೋಪ... ... ... ಇನ್ನೂ ಏನೇನೋ..
ನಮ್ಮ ರಾಮಾಚಾರಿ ಒಬ್ಬ in-house rebel..

ಅದೇ ಚಾಮಯ್ಯ ಮೇಷ್ಟ್ರು .. ಸಭ್ಯ ಹೃದಯವಂತ, ಪ್ರೀತಿ ವಾತ್ಸ್ಯಲ್ಲದ ಚಿಲುಮೆ, ರಾಮಾಚಾರಿ ಗುಂಡನ ಒಳಗಿನ ಒಳ್ಳೆತನದ ಮೇಲೆ ನಂಬಿಕೆಯಿರುವಂತಹ ವ್ಯಕ್ತಿ.. ಅವನನ್ನು ಹೇಗಾದರೂ ಮಾಡಿ ದಾರಿಗೆ ತಂದು ಒಬ್ಬ ದೊಡ್ಡ ಮನುಷ್ಯನನ್ನಾಗಿ ಮಾಡಬೇಕೆಂಬ ಆಸೆ...

ಈ ಚಿತ್ರವನ್ನು ಸುಮಾರು ಒಂದು ಹತ್ತು ಬಾರಿಯಾದರೂ ನಾನು ನೋಡಿರಬಹುದು.. ನೋಡಿದಾಗಲೆಲ್ಲ 'ಆಹಾ ಎಂತಹ ಜೋಡಿ, ಮೇಷ್ಟ್ರು , ರಾಮಾಚಾರಿ' ಎನ್ನಿಸುತ್ತಿತ್ತು.
ಯಾವಾಗಲೊಮ್ಮೆ ನಾಗರಹಾವಿನ ಎರಡನೇ ಭಾಗ ಇದ್ದರೆ ನೋಡಬೇಕು, ಇಲ್ಲವಾದರೆ ತೆಗೆಯಬೇಕು ಎಂಬ ಆಸೆಯಾಗುತ್ತಿತ್ತು..

ಸದ್ಯಕ್ಕಂತೂ... ಈ ಆಸೆ ಆಸೆ ಯಾಗಿಯೇ ಉಳಿಯಲಿದೆ..
ಡಿಸೆಂಬರ್ ೩೦ ರಂದು ವಿಷ್ಣುವರ್ಧನ್ ಹೋದದ್ದಷ್ಟೇ.. ನಾಗರಹಾವು ಫಿಲಂ climax ನಂತೆ .. ಇಂದು ಅಶ್ವಥ್ ರವರೂ ತಮ್ಮ ಶಿಷ್ಯನ ಬಳಿಗೆ ಹೋಗಿಬಿಟ್ಟರು...

ಎಲ್ಲೋ ಹೃದಯದಾಳದಲ್ಲಿ "ಮೇಷ್ಟ್ರೇ! ... ರಾಮಾಚಾರಿ! ... ಮೇಷ್ಟ್ರೇ! ... ರಾಮಾಚಾರಿ!... " ಇನ್ನೂ ಕೇಳುತ್ತಾ ಇದೆ -
ಆದರೆ ಆ ದೃಶ್ಯ ಮುಂದಕ್ಕೆ ಹೋಗುತ್ತಲೇ ಇಲ್ಲ..
ಮನಸ್ಸಿಗೆ climax ಮುಗಿಸಲು ಇಷ್ಟವೇ ಇಲ್ಲ.... ....
ಹೀಗೆ ಯಾಕೋ.. ಕಣ್ಣು ಕೂಡ ಈ ವಿಚಿತ್ರ ಭಾವನೆಯನ್ನು ತಡೆ ಹಿಡಿಯಲಾಗದೆ.. ಹನಿಯನ್ನು ಹಾಕುತ್ತಿದೆ ..


"ಮೇಷ್ಟ್ರೇ! ... ರಾಮಾಚಾರಿ! ... ಮೇಷ್ಟ್ರೇ! ... ರಾಮಾಚಾರಿ!... .................................................................